Կապանի համայնքի ավագանու՝ նոյեմբերի 29-ին կայանալիք ընտրություններին կմասնակցեն երեք քաղաքական ուժ՝ «Շանթ դաշինք» ազգայնական կուսակցությունը, «Ապրելու երկիր» և «Քաղաքացիական պայմանագիր» կուսակցությունները։ Հոկտեմբերի 31-ին Կենտրոնական ընտրական հանձնաժողովում (ԿԸՀ) անցկացված վիճակահանության արդյունքում որոշվել են քվեաթերթիկներում քաղաքական ուժերի հերթական համարները։
Իշխող «Քաղաքացիական պայմանագիր» կուսակցությունը քվեաթերթիկում հանդես կգա 10-րդ համարով։ Կուսակցության ընտրական ցուցակը գլխավորում է Նարեկ Բաբայանը՝ Զանգեզուրի պղնձամոլիբդենային կոմբինատում կառավարության ներկայացուցիչը և ՔՊ Կապանի տարածքային խորհրդի ղեկավարը։ Ցուցակի երկրորդ տեղում Սյունիքի մարզպետի տեղակալ Հայկ Հարությունյանն է, իսկ երրորդում՝ Ազգային ժողովի նախկին պատգամավոր Մարինա Ղազարյանը։ ՔՊ-ի ցուցակում ընդգրկված է 71 թեկնածու։
«Շանթ դաշինք» ազգայնական կուսակցությունը ընտրություններին կմասնակցի 2-րդ համարով։ Դաշինքի ցուցակը գլխավորում է Կապանի գործող համայնքապետ Գևորգ Փարսյանը։ Երկրորդ տեղում համայնքի ղեկավարի առաջին տեղակալ Գոռ Թադևոսյանն է, իսկ երրորդում՝ Կապանի «Թումո» կենտրոնի համակարգող Անուշ Մեժլումյանը։ Դաշինքի ընտրական ցուցակում ընդգրկված է 70 թեկնածու։
«Ապրելու երկիր» կուսակցությունը քվեաթերթիկում կլինի 3-րդ համարի ներքո։ Կուսակցության ցուցակը գլխավորում է Տիգրան Աղասյանը։ Երկրորդ հորիզոնականում Կապանի ավագ դպրոցի ուսուցչուհի Սոֆյա Հարությունյանն է, իսկ երրորդում՝ Արկադիա Լալազարյանը։ Կուսակցությունն ընտրություններին ներկայանում է 23 թեկնածուով։
Այսպիսով, երեք քաղաքական ուժերը Կապանի ավագանու ընտրություններին ներկայանում են տարբեր թվով թեկնածուներով․ ՔՊ-ն՝ 71, «Շանթ դաշինքը»՝ 70, իսկ «Ապրելու երկիրը»՝ 23 թեկնածուով։
Նշենք, որ Կապանի ավագանին բաղկացած է լինելու 27 անդամից, իսկ համայնքում ընտրողների թիվը կազմում է 33 հազար 340։ Ընտրություններն անցկացվելու են համամասնական ընտրակարգով, այսինքն՝ ընտրողները քվեարկելու են քաղաքական ուժերի ընտրական ցուցակների օգտին։
Կապանի համայնքի ավագանու ընտրությունները տեղի կունենան 2026 թվականի նոյեմբերի 29-ին։ Քվեարկությունը կանցկացվի ժամը 08։00-ից մինչև 20։00-ն։
ԿԻՍՎԻՐ ԸՆԿԵՐՆԵՐԻԴ ՀԵՏ:
Գովազդ
