ՀՀ արդարադատության նախարարության «Գորիս» քրեակատարողական հիմնարկում կանխվել է արգելված իրերի փոխանցման փորձ։
Քրեակատարողական ծառայության հաղորդմամբ՝ հիմնարկի պահպանության ապահովման և ուղեկցումների բաժնի ծառայողը տեսահսկման համակարգի միջոցով նկատել է, որ արտաքին տարածքից փաթեթ է նետվում խցերից մեկի ուղղությամբ։
Ծառայողներն անմիջապես զննել են տարածքը՝ միաժամանակ հսկողություն սահմանելով տվյալ խցի ներսում։
Զննության արդյունքում արգելագոտու տարածքում հայտնաբերվել է մեկ փաթեթ, իսկ մյուսը՝ խցի պատուհանագոգի արտաքին հատվածում։ Փաթեթներում եղել են 8 բջջային հեռախոս, հեռախոսի 4 պատյան, 2 զույգ ականջակալ և լիցքավորման լար։
Բացի այդ՝ խցում իրականացված խուզարկության ընթացքում հայտնաբերվել է ևս 2 բջջային հեռախոս։
Դեպքի առթիվ ձեռնարկվել են համապատասխան միջոցառումներ։
