Այսօր՝ դեկտեմբերի 24-ին, խոշոր ավտովթար է տեղի ունեցել Սյունիքի մարզում։ Ժամը 10։30-ի սահմաններում Սյունիքի մարզի բնակիչ 25-ամյա Գոռ Հ․-ն իր վարած Toyota Camry մակնիշի ավտոմեքենայով Երևան-Մեղրի Մ2 ավտոճանապարհի 359 կմ հատվածում դուրս է եկել հանդիպակաց գոտի, բախվել հանդիպակաց երթևեկող, Լոռու մարզի բնակիչ 50-ամյա Գոռ Դ․-ի վարած MAN մակնիշի բեռնատարին և հայտնվել ճանապարհի աջակողմյան հատվածում։
Ինչպես հայտնում է ֆոտոլրագրող Գագիկ Շամշյանը, վթարի հետևանքով Toyota-ի ուղևոր, Սյունիքի մարզի բնակիչ 29-ամյա Վազգեն Հ․-ն մարմնական վնասվածքներով տեղափոխվել է «Մեղրու» բժշկական կենտրոն։
Օպերատիվորեն դեպքի վայր են ժամանել Արտակարգ իրավիճակների նախարարության Փրկարար ծառայության Մեղրու թիվ 56 հրշեջ փրկարարական ջոկատից 1 մարտական հաշվարկ։
Հրշեջ-փրկարաները հոսանքազրկել են ավտոմեքենաները և սահմանազատել տարածքը։
Օպերատիվորեն ժամանել են Ճանապարհային ոստիկանության 2-րդ սպայական գումարտակի 6-րդ վաշտի 2-րդ դասակի ծառայողները վաշտի հրամանատար Վաչե Ալավերդյանի, դասակի հրամանատար Արմեն Սարգսյանի գլխավորությամբ։
Օպերատիվորեն ժամանել են նաև ոստիկանության Մեղրու բաժնի օպերատիվ խումբը՝ բաժնի պետի ծառայության գծով տեղակալ Ազատյանի գլխավորությամբ։
Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է Հայաստանի քննչական կոմիտեի Սյունիքի մարզային քննչական վարչություն, որտեղից ժամանել է քննչական խումբը՝ ավագ քննիչ Մինասյանի գլխավորությամբ, ում կողմից նախաձեռնվել է քրեական վարույթ։
Գ․ Շամշյանի տեղեկություններով՝ Toyota-ի վարորդն ու վիրավոր ուղևորը հարազատ եղբայրներ են։
Լուսանկարները Յուրա Գաբրիելյանի
Նյութի աղբյուր` shamshyan.com
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
ԿԻՍՎԻՐ ԸՆԿԵՐՆԵՐԻԴ ՀԵՏ:
Գովազդ
