Կապան
6 777

Կապանում վթարի ենթարկված Սարգիս Միքայելյանը զրկվել է վարորդական իրավունքից


SHAMSHYAN.com-ի տեղեկություններով՝ 2023 թվականի դեկտեմբերի 10-ին ավտովթար է տեղի ունեցել Սյունիքի մարզում, ինչի հետևանքով էլ սիրված հաղորդավար, ժողովրդին հայտնի «Պահմտոցի» հումորային հաղորդման հեղինակ և վարող Սարգիս Միքայելյանը տեղափոխվել է հիվանդանոց։

Ինչպես հայտնում է ֆոտոլրագրող Գագիկ Շամշյանը, այդ օրը ժամը 21։20-ի սահմաններում Երևանի բնակիչ 60-ամյա Սարգիս Միքայելյանը իր վարած «ՈՒԱԶ 3163» մակնիշի ավտոմեքենայով Կապան-Ծավ ավտոճանապարհի 40 կմ հատվածում դուրս է եկել երթևեկելի գոտուց դեպի ձախ և կողաշրջվելով հայտնվել ձորում։

Վթարի հետևանքով Սարգիս Միքայելյանը մարմնական վնասվածքներով տեղափոխվել է «Կապան» բժշկական կենտրոն։

Հիվանդանոց նա դիմել է դեպքի հաջորդ օրը, իսկ մինչ այդ իր ավտոմեքենան վերամբարձ կռունկի միջոցով դուրս են բերել անվտանգ վայր։

Հիվանդանոցից էլ ահազանգ է ստացվել ոստիկանության Կապանի բաժին, որտեղից էլ տեղեկությունը փոխանցել են Հայաստանի Քննչական կոմիտեի զինվորական քննչական վարչության 9-րդ կայազորային քննչական վարչություն, որտեղ դեպքի փաստով ավագ քննիչ Երվանդ Ղոնյանի որոշմամբ նախաձեռնվել է քրեական վարույթ։

Գ․ Շամշյանի տեղեկություններով՝ ՀՀ ՆԳՆ ոստիկանության Պարեկային ծառայության Սյունիքի մարզի գումարտակի պարեկը փորձել է սթափության  ենթարկել Ս․ Միքայելյանին, սակայն վերջինս հրաժարվել է սթափություն հանձնելուց։

Քննիչը նույնպես հիվանդանոցում է փորձել սթափության ենթարկել նրան, այնտեղ նույնպես հրաժարվել է, ինչի համար էլ նա 2 տարով զրկվել է ավտոմեքենա վարելու իրավունքից։

Լուսանկարները՝ Դավիթ Հայրապետյանի

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։


Նյութի աղբյուր՝ shamshyan.com

ԿԻՍՎԻՐ ԸՆԿԵՐՆԵՐԻԴ ՀԵՏ:

Գովազդ

Միացեք մեզ ֆեյսբուքում

Վերջին լուրեր