Վերջին լուրեր:
Սյունիքի մարզի Գորիս համայնքի Որոտան վարչական շրջանում երեկ բնակարանամուտ են նշել վեց ընտանիք։
Հիշեցնենք, որ Որոտանում բնակարանների կառուցման նախագիծը մեկնարկել էր 44-օրյա պատերազմից հետո։ Շինարարությունն իրականացվել է Գորիսի համայնքապետարանի միջոցներով։
«Շատ կարևոր է, որ սահմանային բնակավայրերի ամրացման համար նման ծրագրեր իրականացվեն։ Համայնքի միջոցներով է արվել ծրագիրը՝ վեց ընտանիքների համար է բնակարանը նախատեսված։ Վեց ընտանիքներից երեքը Արցախից տեղահանված ընտանիքներ են: Ծրագիրը վերաբնակեցման միտում ունի, որպեսզի Որոտանում նաև ընտանիքներ վերաբնակեցվեն»,-ArmDaily.am-ին ասաց Գորիսի ավագանու անդամ Իրինա Յոլյանը։
Բնակարանամուտին ներկա էին նաև Գորիսի համայնքապետ Առուշ Առուշանյանը, Կապանի համայնքապետ Գևորգ Փարսյանը,Մեղրիի և Սիսիանի նախկին համայնքապետեր, իսկ այժմ ԱԺ պատգամավորներ Մխիթար Զաքարյանն ու Արթուր Սարգսյանը։ Բնակարանների բանալիները նոր սեփականատերերին հանձնել են սյունեցի նախկին ու ներկա համայնքապետերը։
Հեղինակ՝ Հայկա Ալոյան
Աղբյուրը՝ armdaily.am
